نصائح ذهبية لكل مهندس ومهندسة
هنكتب الان لكل مهندس مدني أو عمارة إزاى ينجح فى عمله وحياته فى ١٢ نقطة مختصرة فيها كل أسرار النجاح والتميز فى عملك وحياتك و هى خلاصة خبرتى الطويلة فى العمل الهندسي:
١- اتعلم كتيير واشتغل كتيير و اتكلم قليل لأن شغلك هو من يقول للجميع : من أنت .
٢- وقتك هو رأس مالك وثروتك وسر نجاحك المالى فاستثمره صح فى مهارات هتجنى لك مال كتييير ، وكلما زادت مهاراتك زادت أموالك .
٣- عاداتك اليومية الصباحية اليومية لها عامل كبير جدا فى نجاح باقى يومك كصلاة الفجر وقراءة القرآن يوميا( ولو صفحة واحده) والأذكار والأدعية وتحضير فطورك بنفسك والإهتمام بأكلك الصحى وترتيب مكتبك وغرفتك وأوراقك وتخطيط جدول أعمالك ...و...و. ..إلخ .
٤-الناجحين بيتميزوا بالنشاط والتنظيم والسرعة وبيكتبوا يوميا جدول أعمالهم فى نقاط مكتوبة محدد فيها الأهم فالمهم فالأقل أهمية وفعلا بينفذوا كل المكتوب فيها .
٥- خلى علاقاتك طيبة بالناس وذوق ويكون عندك فن الرد على كلام كل الشخصيات المختلفة، والذكاء إنك تحتوى كل الشخصيات ساعتها أغلب الناس هتحبك ولكن رضا كل الناس غاية لا تدرك ولازم هتلاقى أعداء نجاح .
٦- أعداء النجاح فى شغلك خد من نقدهم فقط كل ما يصلحك ويطور منك ، أما باقى كلامهم فالحل التجاهل تماما وعدم التركيز معهم لأنك هتكتشف إنهم قلة جدا بالنسبة للى بيحبوك .
٧-احط نفسك دايما بهالة كبيرة من الناجحين المشجعين لك نحو النجاح واللى بيفيدوك فى حياتك وعملك وده سواء فى الواقع أو ع السوشيال ميديا وابعد عن المثبطين لهمتك و أصحاب الطاقات السلبية المتشائمة اللى بتقلل من عزيمتك وشغفك وحماسك .
٨- مفيش نجاح فى الدنيا بدون عثرات وصدمات وأزمات وأسافين من البشر لأن الحياة ابتلاءات والشاطر اللى يثبت أكتر والصدمات بتقويه أكتر وبتصنع منه شخص أقوى وبيتعلم منها .
٩- اتعلم من فشلك وعثراتك ولولا الفشل ما كنا عرفنا الأخطاء والأخطاء هية اللى بتعلمنا وTry & error والشاطر اللى ياخد من مرحلة الفشل درس و سلمة تقويه وتطلعه نحو قمة النجاح .
١٠ - الناجحين تفكيرهم دايما إيجابي ومتفائلين ومؤمنين جدا بقدراتهم على تحقيق النجاح والوصول ولا يستسلموا ولا يتأثروا أبدا بكلام المثبطين لهم وعندهم فعلا إصرار وعزيمة كبيرة جدا قادرة على تحطيم الجبال فكن أنت منهم 👌👌
١١- دايما تتقى الله فى كل أفعالك وأقوالك عشان ربنا يكرمك فى حياتك وعملك ومالك وصحتك .
١٢- دايما تاخد بالأسباب والسعى وطرق جميع الأبواب عشان ما تحسش إنك قصرت لأن الأسباب ما هي إلا أسباب دنيوية فى مقدرتك لكن ماذا عن رب الأسباب ومسبب الأسباب؟! فتوكل على الله الحى الذى بيده ملكوت كل شيء ...
وافتكر دايما قول الله تعالى " ومن يتوكل على الله فهو حسبه "... وقوله" وما توفيقي إلا بالله "... جعلنى الله وإياكم من الناجحين المتفوقين في الدنيا والآخرة ❤️❤️
م.ياسمين عبد القوي