إزاي تعمل مستخلص العميل (المالك)
بسهولة وبطريقة إحترافية
(١) أقرأ العقد والمواصفات الفنية للمشروع اللي أنت شغال فيه بدقة وتمعن، وشوف هل في دفعة مقدمة ولا لأ ؟، وهل المالك هو اللي هيقوم بتوريد الحديد والأسمنت ولا لأ عشان لو المالك هو اللي هيورد الحديد والأسمنت هيتعمل استقطاع (Retention) لقيمة الحديد والأسمنت والدفعة المقدمة من قيمة المستخلص على حسب كميات الحديد والأسمنت الموردة للموقع خلال فترة عمل المستخلص المتفق عليها في العقد (وغالباً بيتم عمل مستخلص العميل بصورة شهرية)
(وغالباً المالك لو هو اللي هيورد الحديد والأسمنت بيكون مثبت سعر توريد للحديد والأسمنت على مدار فترة تنفيذ المشروع).
(٢) اعمل شيت excel للمقايسة لكل discipline شيت منفصل على شكل بنود طبقاً لتسلسل وترتيب البنود واسم البنود اللي موجودة عندك في ال BOQ وضيف فيه كميات الحصر الهندسي للبنود وكل فترة اعمله update طبقاً للحصر المعتمد من إستشاري المالك (بمعنى هتعمل شيت اكسيل لكل بنود المقايسة اللي عندك سواء كانت:
Structure discipline, Architecture discipline or MEP discipline).
(٣) اعمل شيت excel لكل البنود الإضافية والمستجدة (Variations) اللي عندك في المشروع بكميات الحصر وموقف إعتمادها من إستشاري المالك.
(٤) اطلب من ال DC اللي عندك في المشروع يعملك update ل (IR Logs for all discipline) وشوف ايه الأعمال اللي تم تسليمها وايه الأعمال التي لم يتم تسليمها عشان إستشاري المالك بيرجع نسب كل بند في المستخلص طبقاً لموقف IR.
(٥) تواصل مع مسؤول المخازن اللي عندك في المشروع واطلب منه شيت excel بجميع التشوينات و التوريدات اللي عندك في المشروع وحدثها بشكل دوري (عشان لما تيجي تعمل المستخلص تضيف فيه نسبة التشوينات و التوريدات على حسب النسبة اللي متفق عليها مع استشاري المالك، وغالباً بتكون نسبة التوريدات والتشوينات 70% من إجمالي سعر البند ) ودي هتزود معاك ال Cash in في المستخلص.
(٦) اطلب من مهندس التخطيط Planning Engineer اللي عندك في المشروع (موقف تنفيذي مدعم بصور) لما تم تنفيذه من بداية المشروع حتى تاريخ عمل المستخلص عشان الموقف التنفيذي دا بيتم إرفاقه مع مستخلص العميل.
(٧) اعمل موقف مالي (Financial Situation) لكل مستخلص جاري عشان تبين قيمة الفلوس اللي متوقع صرفها من كل مستخلص (expected cash in)، ودي حاجه internal عشان ال CEO بتاع الشركة اللي أنت شغال فيها يبقى عارف ومتوقع قيمة ال Cash in اللي هيدخله كام من هذا المستخلص.
م.محمد صلاح