60 نصيحة قبل ما تشتغل في المقاولات لحسابك الخاص
1- ماتشتغلش شغل خاص وانت لسه متخرج، لازم تشتغل كموظف في شركة في الأول قبل ما تاخد الخطوة دي.
2- ما تشاركش حد، ابدأ لوحدك لو جاهز أو استنى لما تجهز.
3- هاتقابل مقاولين وناس معارفك عاوزة تشاركك.. افتكر إني قولتلك بلاش.
4- ماتشتريش خشب على الأقل في الأول، هات مقاول بعدته أفضل.
5- ما تستعجلش.
6- عشان تشتغل مقاولات لحسابك لازم تكون اشتغلت تنفيذ في شركة الأول.
7- يفضل تكون اشتغلت مكتب فني كمان أو تعرف تقوم بشغل المكتب الفني.
8- مهم يكون عندك دولاب صنايعية محترم وتكون اشتغلت معاهم قبل كدة وجربتهم في شغل.
9- الصنايعية اللي معاك لازم تكون عارفهم كويس وتقدر توصل لهم في أي وقت.
10- لازم يكون عندك في كل بند أكتر من مقاول.
11- الصنايعية والمقاولين والعمال هما رجالتك، حافظ عليهم وخلي علاقتك بيهم كويسة.
12- لازم تكون عندك قايمة موردين لجميع الخامات ويفضل تكون اتعاملت معاهم.
13- لازم تكون قوي فنياً وتكون بتعرف تستلم البنود في الموقع.
14- لازم تكون قوي إدارياً وبتعرف تتعامل مع الصنايعية والعمال وتحل مشاكلهم.
15- لازم تكون بتعرف تكتب مقايسات.
16- لازم تكون بتعرف تحصر كميات.
17- لازم تكون بتعرف تسعر بنود.
18- لازم تكون بتعرف تعمل مستخلصات.
19- الحاجات اللي فاتت دي لو لسه ماتعرفهاش يبقى انت مش جاهز دلوقتي.
20- مش لازم يكون معاك رأس مال عشان تبدأ.
21- عشان تبدأ بدون رأس مال يبقى تشتغل مع عملاء أفراد مش شركات.
22- لو معاك رأس مال ماتجازفش بأكتر من 25% منه.
23- لو قررت تشيل شغل من شركات في البداية (ما انصحكش) لازم تكون عامل حسابك إن مستحقاتك هتتأخر وفي استقطاعات بتتخصم لازم تكون حاسبها كويس.
24- لو هتشتغل مع عملاء أفراد أفضل طرق اتفاق هي الـ Cost Plus والـ Fixed Fees .
25- لازم تكون عارف إزاي هتسوق لشغلك.
26- أصعب عقبة هتقابلك في الشغل هي إنك تجيب شغل في البداية.
27- ما تآمنش للصنايعية والعمالة.
28- ما تآمنش للعملاء.
29- ما تآمنش لحد.
30- ماتشيلش شغل انت مش قده.
31- ماتشتغلش حاجة مش عارفهما.
32- ماتشتغلش لحسابك إلا لو عندك شوية خبرة وعلاقات تتسند عليهم.
33- شغل المقاولات بيكسب فلوس كتير (أكترمما تتخيل) لو عرفت تديره صح.
34- شغل المقاولات بيخسر فلوس كتير (أكتر مما تتخيل) لو ماعرفتش تديره صح.
35- لو انت لسه متخرج ومش عاوز تشتغل موظف عند حد وتبدأ بشغل لحسابك بلاش عشان هتندم.
36- مش لازم تستنى كتير بعد التخرج عشان تبدأ.. ومالهش فترة ثابته.. بس انت لو اجتهدت ممكن خلال سنتين بعد تخرج تقدر تبدأ شغل خاص لحسابك.
37- وانت شغال في الشركة كموظف أكتر حاجة تركز عليها هي العلاقات والإداريات.
38- افتكر دايماً إن رضا العميل مرتبط بـ 3 حاجات (الجودة والتكلفة والوقت) لو قدرت تشتغل على الـ 3 عوامل دي هتنجح بسرعة.
39- هتقابل ناس تخوفك من خطوة إنك تشتغل لحسابك، ماتسمعلهومش.
40- أهم حاجة في الشغل سمعتك.. راعي ضميرك في الشغل واجتهد عشان الـ word Of Mouth عنك هي اللي هتجيبلك شغل.
41- ماتستصغرش شغلانة.
42- الشغل بيجيب شغل.
43- هتتعب شوية على ماتعرف تجيب أو شغلانة، ماتيأسش.
44- استلم كل حاجة بنفسك.
45- ماتسيبش الوظيفة إلا لو وقفت شغلك الخاص على رجله.
46- حاول ماتصرفش على الشغل من جيبك.. الشغل يصرف على نفسه.
47- حاول شغلك يكون قريب من بعضه عشان تقدر تتابعه.
48- شغل المقاولات هو أكتر حاجة بتجيب فلوس بعد الآثار والمخدرات.
49- الناس اللي هتحبطك في الأول بيعملوا كدة إما عشان هما بيكرهوك ومش عاوزينك تنجح، أو بيحبوك وخايفين عليك تفشل، مالكش دعوة بالأتنين.. كمل في طريقك انت صح.
50- شغل التشطيبات أسهل في التسويق وشغل الخرسانات أسهل وأسرع في الشغل.
51- ماتستعجلش خطوة إنك تأسس مكتب مقاولات إلا لو هتشيل شغل من شركات ومحتاج أوراق قانونية.
52- لو محتاج مكان تأسس عليه أوراق رسمية أو تقابل فيه العملاء ممكن تستعين بـ Co-working space
53- الشغل مع الجهات الحكومية فلوسه مضمونه بس بتتأخر.
54- الشغل مع الشركات الخاصة فلوسه مابتتأخرش بس مش مضمونه.
55- الشغل مع العملاء فلوسه مضمونه ومابتتأخرش لأن العميل هو اللي بيصرف على الشغل.
56- أكتر حاجة تكسبك أو تخسرك هي إنك تكون بتعرف تسعر البنود صح.
57- القدرة على إقناع العميل مهارة لو مش عندك لازم تتعلمها.
58- المقاولات هي Mix بين الهندسة والتجارة والإدارة، لازم تكون فاهم ده كويس.
59- راعي ضميرك في شغلك.
60- ماتاكلش حق صنايعي أو عامل مآمنك على عرقه، وماتخونش أو تسرق عميل مآمنك على فلوسه.
بالتوفيق
مصطفى عفيفي